У сакавіку гэтага года ў сваёй кватэры быў знойдзены труп 20-гадовай гамяльчанкі. Смерць наступіла ад вострага атручвання асабліва небяспечным наркатычным сродкам — метадонам.
Як стала вядома, 21-гадовы прыяцель загінулай прыйшоў да яе ў госці і пачаставаў наркотыкам, таксама яны ўжывалі алкагольныя напоі. Пазней да іх далучыўся агульны прыяцель, які назаўтра раніцай знайшоў дзяўчыну нежывой, а прыяцеля — без прытомнасці, і выклікаў хуткую дапамогу.
Пазней следчыя высветлілі, што 21-гадовы гамяльчук раней не судзімы, халасты, часова не працаваў. Наркотык яму збыў 31-гадовы знаёмы — таксама часова непрацуючы, раней судзімы, у тым ліку за злачынствы, звязаныя з незаконным абаротам наркатычных сродкаў і псіхатропных рэчываў. Дарэчы, яго праваахоўнікі знайшлі без прытомнасці ў грамадскім транспарце незадоўга да трагедыі з памерлай дзяўчынай, піша «Гомельская праўда».
У зале суда маці загінулай падкрэсліла, што прысуд ужо не мае ніякага значэння — назад вярнуць нічога нельга. І дадала, што ёй вельмі шкада ўсіх у гэтай сітуацыі, у тым ліку абвінавачаных і іх маці. Фігуранты крымінальнай справы прызналі сваю віну часткова.
Суд Навабеліцкага раёна вынес абвінаваўчы прысуд. За незаконны абарот наркатычных сродкаў, які пацягнуў па неасцярожнасці смерць чалавека, 21-гадоваму гамяльчаніну прызначана 15 гадоў пазбаўлення волі ў калоніі ўзмоцненага рэжыму. 31-гадоваму прыяцелю за распаўсюд наркатычных сродкаў — 8 з паловай гадоў у калоніі ўзмоцненага рэжыму. Прысуд у законную сілу не ўступіў. Можа быць абскарджаны і апратэставаны.
