Праваахоўныя органы Францыі затрымалі жыхара рэспублікі па падазрэнні ў замаху на жыццё прэзідэнта Эманюэля Макрона падчас яго паездкі ў дэпартамент Ду.
Інцыдэнт адбыўся 27 красавіка пасля цырымоніі ў памяць пра лідара гаіцянскай рэвалюцыі 1791-1804 гадоў Тусенэ-Луверцюрэ. Каля замка Шато дэ Жу, куды адправіўся кіраўнік дзяржавы, сабраліся пратэстоўцы супраць пенсійнай рэформы, якія паспрабавалі прарваць ачапленне. У ходзе сутыкненняў жандармы ўжывалі слёзатачывы газ. Калі ж Макрон збіраўся адбыць адтуль на верталёце, адзін з пратэстоўцаў запусціў у яго ракету з газавай шашкай.
Расследаванне паказала, што піратэхніку ў прэзідэнцкі борт запусціў 20-гадовы цясляр, які з’яўляецца актывістам левага руху. Яго затрымалі на гэтым тыдні і змясцілі пад варту. У дачыненні да маладога чалавека антытэрарыстычная пракуратура Францыі пачала расследаванне ў сувязі са спробай знішчэння верталёта, замахам на жыццё супрацоўнікаў праваахоўных органаў, якія знаходзіліся ў ім, а таксама замахам на жыццё прэзідэнта. Ці мог яго ўчынак сапраўды пагражаць падзеннем верталёта, будзе ўстаноўлена ў ходзе экспертызы.
Затрыманы не адмаўляе свайго ўчынку, заяўляе, што такім чынам хацеў «кінуць выклік» Макрону і даць зразумець, што жыхары рэспублікі не згодныя з яго палітыкай.
Абвінавачванне настойвае на падаўжэнні ўтрымання падазраванага пад вартай і правядзенні ў дачыненні да яго псіхіятрычнай экспертызы. Адвакат затрыманага ў сваю чаргу заявіў, што абскардзіў патрабаванне аб заключэнні яго падапечнага, піша Le Parisien.
