Засушлівае лета прывяло да таго, что ў сярэдзіне ліпеня грыбы – самы сапраўдны дэфіцыт. Ды і адкуль ім узяцца, калі доўгі час не было дажджоў?
Праўда, пару тыдняў таму ў Гродзенскай і Брэсцкай абласцях прайшлі добрыя дажджы.
У гэтыя дні на аўтамабільнай трасе Гродна-Мінск мясцовыя жыхары традыцыйна прадаюць падарункі леса – грыбы, чарніцы і суніцы, маліну. Таму многія мінчане, якія вяртаюцца дадому з Гродзенскай вобласці, спыняюцца, каб набыць грыбы ці ягады.
Яшчэ не так даўно ў Мінску на Камароўскім рынку паўлітровы слоічак лісічак каштаваў 15 рублёў, затым кошт крыху знізіўся. Можа, на трасе дзешавей?..
У мінулыя выхадныя вырашыў спыніцца на трасе Гродна-Мінск і карэспандэнт “Народнай Волі”, каб даведацца, якія цэны на ягады і грыбы на прыдарожным “рынку” за 130 кіламетраў ад сталіцы.
— Літр чарніц – 8 рублёў, — прапануе мне дзяўчынка-школьніца, якая падчас канікул сумяшчае прыемнае з карысным – і адпачывае, і грошы зарабляе. – Бярыце, не пашкадуеце. Ягады толькі з лесу, сёння з самага ранку збірала.
— А я за 7 рублёў аддам літр, — падае голас канкурэнтка школьніцы.
А вось грыбоў практычна няма. Толькі адна жанчына прадавала лісічкі па 15 рублёў за літровы слоік.
— Прайшлі дажджы больш за тыдзень таму, а зараз ізноў усё павысыхала, — тлумачыць прадаўшчыца. – Хутка і гэтых грыбоў не будзе, таму купляйце зараз.
