Жонка палітыка Мікалая Статкевіча распавяла “Народнай Волі” пра пяцімесячную ізаляцыю мужа.
Нагадаем, што Статкевіч быў затрыманы 31 мая 2020 года па дарозе на Камароўскі рынак у Мінску, дзе ён збіраўся наведаць перадвыбарчы пікет Святланы Ціханоўскай.
Палітык быў арыштаваны на 15 сутак, затым прайшоў яшчэ адзін суд, які пакараў яго яшчэ 15 суткамі. На волю ён так і не выйшаў. 14 снежня 2021 года Мікалаю Статкевічу быў вынесены прысуд паводле ч. 1 арт. 293 Крымінальнага кодэкса (Арганізацыя масавых беспарадкаў) — 14 гадоў зняволення ў калоніі асаблівага рэжыму.
Таксама МУС уключыла Статкевіча ў спіс асобаў, датычных да экстрэмісцкай дзейнасці.
Адбывае пакаранне палітык у Глыбоцкай калоніі…
— З 9 лютага пра Мікалая нічога не чуваць, — кажа яго жонка Марына Адамовіч. – Апошні ліст прыйшоў пяць месяцаў таму. Нават не ведаю, дзе ён зараз знаходзіцца – ці то ў штрафным ізалятары, ці то ў памяшканні камернага тыпу.
Але трэба разумець, што Мікола сядзіць на камерным рэжыме па вызначэнні, бо адбывае пакаранне ў калоніі асаблівага рэжыму. Таму як мінімум трэць тэрміна ён будзе знаходзіцца ў камеры.
Пасля этапа яго адправілі ў ШІЗА, а затым у адзіночную камеру памерам метр на тры. Пры гэтым большую частку часу праводзіў не ў камеры, а ў штрафным ізалятары.
А дзе канкрэтна зараз знаходзіцца, як ужо казала, нават і не ведаю. Магчыма, увесь час у ШІЗА. Можа, нейкія прасветы былі, але ў мяне пра гэта няма ніякай інфармацыі.
— Адвакат не наведвае Мікалая?
— Адваката не пускаюць апошнім часам, кажуць, што, як быццам, няма ад мужа заявы на спатканне з абаронцам.
Я ў гэта, натуральна, не веру. Ведаю, што пасля візіта адваката Мікола адразу ж піша наступную заяву на сустрэчу. Іншая справа – куды ўсё гэта знікае?
— А перадачы ці дазволены?
— За год толькі адну бандэрольку перадала Міколу, яшчэ зімой. У калоніі асаблівага рэжыму і так дазволена толькі адна перадача і дзве бандэролькі, але і гэтага практычна пазбавілі.
— Вы працягваеце мужу пісаць лісты?
— Безумоўна, але я нават не ведаю, ці атрымлівае іх Мікола.
— Вы звярталіся ў Дэпартамент выканання пакаранняў, каб прасвятліць сітуацыю?
— І ездзіла туды, і пісала ім шмат разоў. Перапіска ж зняволеным не забаронена. А з калоніі мне адказалі, што я Мікалаю адправіла 43 лісты, а ён мне сорак. Гэта, мякка кажучы, няпраўда, таму што толькі з канца студзеня, калі я ізноў пачала нумараваць лісты, адправіла мужу сорак пасланняў. Таму за ўвесь час адправіла ў калонію не сорак, а значна больш лістоў.
