Зборнік вершаў «Motherfield» («Мацярынскае поле») беларускай паэткі Юліі Цімафеевай трапіў у доўгі ліст літаратурнай прэміі PEN America. Кніга вылучана ў адмысловай намінацыі PEN America Award for Poetry in Translation — за паэзію ў перакладзе.
З беларускай мовы вершы Юліі Цімафеевай перакладалі беларуска-амерыканская паэтэса Вальжына Морт і амерыканскі паэт, эсэіст і культурны крытык Ханіф Абдурракіб. Зборнік вершаў быў апублікаваны тэхаскім выдаўцом Уілам Эвансам.
На старонцы PEN America кніга прадстаўлена наступным чынам.
«Зборнік вершаў, у якім асабістае непазбежна з’яўляецца палітычным і экалагічным, — «Motherfield» — гэта настойлівае імкненне паэтэсы да самавызначэння ў аўтарытарнай, патрыярхальнай Беларусі.
Юлія Цімафеева нарадзілася ў сельскай мясцовасці Беларусі, якая ў дзяцінстве стала Чарнобыльскай зонай. Кніга адкрываецца дзённікам паэтэсы, у якім запісаны ход гвалту, які разгортваецца ў Беларусі пасля прэзідэнцкіх выбараў 2020 года. У ім малюецца інтымны партрэт барацьбы аўтаркі са страхам, адчаем і пачуццём віны, калі яна выходзіць на акцыі пратэсту, уцякае ад паліцыі, прагне чытацкай аўдыторыі, пазнае аб затрыманні сям’і і сяброў і ў канчатковым рахунку выбірае жыццё ў выгнанні.
Але ці можа яна сапраўды збегчы з заражаных сельскагаспадарчых угоддзяў свайго юнацтва і сваёй нячыстай беларускай роднай мовы? Ці можа яна сапраўды пазбегнуць выпраменьвання свайго мацярынскага поля? […]», — адзначаецца ў анатацыі.
Заснаваны ў 1922 годзе, PEN America — адзін з найбуйнейшых цэнтраў, якія складаюць міжнародную сетку PEN. Яго сябрамі з’яўляюцца больш чым 7500 раманістаў, журналістаў, аўтараў навуковай літаратуры, рэдактараў, паэтаў, эсэістаў, драматургаў, выдаўцоў, перакладчыкаў, агентаў і іншых спецыялістаў у галіне літаратуры. Арганізацыя працуе над тым, каб людзі ва ўсім свеце мелі свабоду ствараць літаратуру, перадаваць інфармацыю і ідэі, выказваць свае погляды і атрымліваць доступ да поглядаў, ідэй і літаратуры іншых людзей.
Цырымонія ўручэння літаратурнай прэміі PEN America сёлета адбудзецца ў ратушы Нью-Ёрка 2 сакавіка. У гэтым годзе аб’яднанне ўручыць 11 кніжных прэмій: за лепшую мастацкую літаратуру, дакументальную літаратуру, паэзію, біяграфію, эсэ, навуковую літаратуру, пераклад і многае іншае, апублікаванае ў 2022 годзе.
Ганна ГАРДЫНЕЦ.
Публікацыя з № 8 газеты “Народная Воля”. Падпісацца на газету.
