Былыя і думы

Наталля ПЯТКЕВІЧ пакінула пасаду намесніка кіраўніка Адміністрацыі прэзідэнта напрыканцы 2010 года. Між тым да гэтага часу яна ўзначальвае Беларускі лыжны саюз і асацыяцыю “Беларуская федэрацыя гарналыжнага спорту і сноўборда”.

— Наталля Уладзіміраўна з’яўляецца ў нас рэдка, — коратка паведамілі “Народнай Волі” ў асацыяцыі. — Хоць па-ранейшаму кіруе федэрацыяй, Беларускім лыжным саюзам (старшыня абіраецца на пяць гадоў). Больш, наколькі вядома, яна нідзе не працуе з тых часоў, як сышла з пасады першага намесніка кіраўніка Адміністрацыі прэзідэнта.

Старшыня Федэрацыі гандбола Беларусі Уладзімір КАНАПЛЁЎ — былы спікер Палаты прадстаўнікоў Нацыянальнага сходу. Пакінуў дзяржаўную пасаду ў 2007 годзе. Як тады паведамлялася, сам падаў заяву аб “датэрміновым вызваленні ад займаемай пасады па стане здароўя і немагчымасцю ў сувязі з гэтым выконваць свае абавязкі на ранейшым узроўні”.

Не так даўно Канаплёў прызнаўся ў СМІ, што ў вышэйшыя эшалоны ўлады ён не рвецца. “12 гадоў я знаходзіўся на вастрыні ўсіх падзей, якія адбываліся ў краіне, — распавёў ён. — З іншага боку, у мяне была публічная пасада, а ад гэтага вельмі стамляешся. Пасля заканчэння работы ў парламенце вакол мяне была практычна мёртвая цішыня: ніякіх тэлефанаванняў, як раней. Амаль год прызвычайваўся да новага жыцця. Потым адаптаваўся. Вяртацца ў палітыку ўжо не хачу. Ды і ўзрост ужо не той: адзначу 58-годдзе, калі ўсё складзецца... Пакуль з гандбола сыходзіць я не збіраюся, калі, безумоўна, не будзе нейкага экстраардынарнага выпадку”.

А вось экс-кіраўніка Адміністрацыі прэзідэнта і асацыяцыі “Беларуская федэрацыя футбола” Генадзя НЯВЫГЛАСА мы хутчэй за ўсё ў бліжэйшы час ізноў убачым на новай дзяржаўнай пасадзе.

Пасля таго як на пачатку гэтага года Нявыглас быў уключаны ў спіс беларускіх чыноўнікаў, якім забаронены ўезд на тэрыторыю Еўрасаюза (у гэты спіс патрапілі таксама Наталля Пяткевіч і Уладзімір Канаплёў. — Аўт.), ён пакінуў сваю пасаду ў федэрацыі і пракаментаваў гэта так: “На жаль, я патрапіў у гэты спіс, а гэта моцна перашкаджае мне працаваць. У мяне ёсць таксама асабістыя матывы, якія не дазваляюць мне цалкам прысвяціць сябе футбольнай дзейнасці”.

І вось пасля футбольнага матча, калі гулялі зборныя Беларусі і Францыі, Генадзь Мікалаевіч прызнаўся: “Ці бачу я сваю будучыню ў футболе? Думаю, не, хоць мяне і звязалі з футболам да канца жыцця, калі абралі ганаровым старшынёй федэрацыі. Але я збіраюся вяртацца на дзяржаўную дарогу”.

...Дарэчы, спартыўныя спецыялісты адзначаюць, што ў сваіх федэрацыях вышэйназваныя “адстаўнікі” зарэкамендавалі сябе даволі нядрэнна. Дык можа, гэта і ёсць іх сапраўднае прызванне?